Pipeline Resto Bar nidaog na gyud

Naka-angkon na gyud og daog ang Pipeline Resto Bar dihang ilang gipakugangan ang Fravu sa iskor nga 98-73 sa 30-anyos pataas nga kategoriya sa gipahigayong Punta Princesa Sports Association (PPSA) second conference basketball tournament didto sa Vicente Sotto Memorial Gym sa Brgy. Punta Princesa ning dakbayan.

Ang Pipeline sa maong kalampusan, nakabawos sa ilang unang duha ka masakit nga kaparutan nga naangkon. Init kaayo ang gipakitang labok sa Pipeline sanglit ila man nga gidominar ang duwa gikan sa pagsugod ngadto na sa katapusang hunat sa lahugay. Mihatud sa kalampusan sa Pipeline mao sila si Jimbo Noel ug Ric Arias kinsa parehong miposte ug double figures.

Si Noel milangkat ug 17 puntos samtang si Arias mihipos og 15 puntos.

Dako usab kaayo og gikatabang si Reeve Jumawan kinsa mikulit ug 12 puntos samtang si Ciobern Mante og Em-em Jumawan parehong mirehistro og 10 puntos matag-usa.

Sa laing duwa, ang Kartabz mikulit sa ilang dakong kadaogan ning torneyo dihang ilang gimasaker ang Khirk Benz, 109-50 sa 40-anyos pataas nga kategoriya. Si Sencio Ibo miposte og 22 puntos samtang si Toto Lawas adunay 20 puntos aron sa paghatud sa Karbatz pagkulit sa ikaduhang daog.