Cebu Ore Mining Siders nakatilaw na og daog

Ang Cebu Ore Mining mikabkab og daog pinaagi sa pagpukan sa Canlontao Siders, 81-75 sa nagpadayong 2005 Cuanos Basketball League niadtong Sabado didto sa Cuanos Sports Square.

Ang kainit ni Manolito Eleguin sa ikaduhang kuwarter maoy naghatod sa unang kadaugan sa Ore Mining.



Determinado kaayo ang Ore Mining nga magmalampuson sa maong duwa, gani wala nila patilawa og labaw ang Siders, bisan og gilupig kini sa reboundings.

Ang gipakitang teamwork sa Ore Mining ubos ni coach Alan Bastida maoy yawi sa ilang kadaugan.

Si Eleguin nga mirehistro og 15 puntos maoy nangulo sa kadaugan sa Miners.

Nangulo sa pilderong Siders mao sila si Bernie Manayon, kinsa miposte og 18 puntos uban ni Eric Barliso, kinsa miabot og 17 puntos.