Lhuillier padayong mosuporta sa NTP

Bisan pa og napiit ang Basketball Association of the Philippines (BAP), nga hangtod karon suspendido pa gihapon sa Philippine Olympic Committee (POC), daghan lang gihapon mipakita sa ilang suporta.

Usa na niini si Michel Lhuillier sa ML Kwarta Padala nga bag-o pa lang nipadayag sa iyang suporta sa pagpadayon sa ensayo sa national training pool.

Kahibawo gyud si Lhuillier nga kinahanglan gyud ipadayon ang maong ensayo sanglit kita man mo-host sa umaabot nga South East Asean Games karong Nobiyembre. "Kung ihunong ang praktis, unya kalit lang bakwi-on sa FIBA ang suspenso sa Pilipinas magkabuang unya ta," matud pang Lhuiller nga gusto gyud siyang andam kanunay ang nasudnong team.

Sa bag-ong kasabotan, ang ML Kwarta Padala ubos ni coach "Yayoy" Alcoseba maoy ibala sa national team ug manguha pa kini og back-up nga makiglahugay sa SEAG kun tugotan nga makaduwa ang Pilipinas sa FIBA.

Salig usab kaayo si Alcoseba nga dili basta-basta ang iyang koponan nga gilangkuban nilang Woodrow Enriquez, Romulo Marata, Pableo Canoneo, Jr. James Laygo, Jercules Tangkay, Aldrin Ocanada, Allan Sayon, Leody Garcia, Leo Bat-og, Jesie Lumantas, Danny Aying, Alano Capotolan ug Marty Olayvar.