Sugbuanon shooters nanghawod sa Parajing Cup

Misidlak ang Cebuano shooters sa 1st Reynaldo Parajing Cup niadtong miaging semana didto sa Ozamiz City.

Si Ric Jason 'Chito' Hernandez maoy milangkat sa titulo sa premier open division, samtang si Jeffrey Alce nipahiluna sa ikaduhang dapit ning maong 8-stage event.

Sa revolver division, si Jimmy Yu mao usab ang nanghawod, samtang si Benson Yu maoy nakakuha sa unang dapit sa standard division.

Ang Cebuano practical shooters naglantaw sa umaabot nga 5th Regional Director's Cup nga pasiugdahan sa San Agustine Pistol and Rifle Association (SAPRA) didto sa Tipanoy, Pingdungan, Iligan City agi'g pasidungog ni Police Chief Supt. Dante Tejada.

Ang Iligan City Mayor's Cup nga gipahigayon sa SAPRA, gi-classify isip level 3, kini nagpasabot nga kinsa kadtong nidaog sa kompetisyon adunay chance nga mo-qualify alang sa Philippine team.

Ang torneyo gitakda karong Septiyembre 14-17, 2005.