May mga higayon ba nga magduka ang usa ka magdudula atol sa iyang pagdula? Mora'g imposible kining mahitabo! Apan matud pa sa mga eksperto, may mga higayon gayod nga masinati kini sa usa ka magdudula. Hinuon, talagsa ra kaayo kining maong kaso. Sumala sa mga awtoridad, kun adunay mga tawo nga magduka atol sa ilang pagtrababo sa opisina, may mga higayon nga mahitabo usab kini sa usa ka bilyarista. Ang pagduka makaapekto sa kalidad sa dula sa usa ka bilyarista. Kini magpasiugda sa daghang kasaypanan o mga sipyat. Mao nga angay pakigbatokan ang pagduka. Kinahanglang malikayan kini sa magdudula tungod kay makaapekto kini pag-ayo sa katibuk-an niyang performance sa dula.
Ang bottom line sa pagduka mao ang pangutana: "Sakto ba ang imong pagkatulog sa miaging gabii?" Pila ba ka oras ang imong pagkatulog? Lima? Unom ka oras lang? Kun ingon niini ang gidugayon sa imong pagkatulog, ayaw kahibulong kun mobati kag duka atol sa imong pagdula. Timan-i nga ang saktong oras sa pagkatulog sa usa ka tawo magsukad sa walo ngadto sa walo-ug-tunga sa oras. Ang saktong pagkatulog kabahin sa pagpangandam sa magdudula alang sa usa ka dula sa torneyo nga iyang pagasalmotan.
Ikaduhang pangutana: "Aduna ka bay sleep disorder?" Kun ikaw kanunay lang magduka atol sa imong pagdula, posibleng may problema ka sa imong pagkatulog sama sa sleep apnea, narcolepsy o insomnia. Kun sa imong paniid aduna ikaw niining sleep disorder, labing maayo nga mokonsulta ka sa usa ka doktor aron kahatagan ka og eksaktong instruksiyon kun unsay maayo nimong buhaton.
Ang mga eksperto sa dulang billiards adunay sugyot aron malikayan ang duka atol sa pagdula. Mahimong moinom og tubig o kaha soda nga may sangkap nga caffeine tungod kay aduna kini stimulant nga makadugang sa pagka alerto sa usa ka tawo. Mahimo usab nga moinom og mga energy drinks.
Laing sugyot mao nga ikondisyon ang huna-huna ngadto sa dula. Sa higayon nga imo nang turno sa pagtira, labing maayo nga molakaw ka libot sa lamesa tungod kay ang paglakaw makatabang aron mapukaw ang imong kahimatngon ug mabuntog ang pagduka. Buhata kini sa dili ka pa modayon sa pagpanako alang sa usa ka tayada.
(For comments and suggestions text at 0910-8105522 o mag-email sa
cuetime_banat@yahoo.com)