CESAFI 2005 season banatan na!

Gipaabot nga magsugwak sa bagang duot sa katawhan ang Cebu Coliseum aron mosaksi sa pagbukas sa 5th Cebu Schools Athletic Foundation, Inc. (CESAFI) basketball season karong adlawa diin ang University of Cebu (UC) Webmasters modepensa sa ilang balwarti batok sa Cebu Institute of Technology (CIT) Wildcats. Mga duwa karon 1 pm Opening 4 pm CIT vs. UC (jrs.) 6 pm CIT vs. UC (srs.)



Ang UC Junior Webmasters makigharong batok sa CIT Wildkittens alang sa pasiunang duwa sa alas 4:00 sa hapon, samtang ang UC Webmasters makighamag sa CIT Wildcats sa main game sa alas 6:00 sa gabii.

Si UC Webmasters coach Roel Gomez nanghinaut nga maayo ang dagan sa ilang kampanya karong season gumikan kay mitapos man lamang sila sa ikaupat nga dapit sa miaging tuig.

Apan ang Webmasters dunay ikapasigarbo gumikan kay hapit man nila pakganga ang walay pilde-pilde ug four-time champion University of the Visayas (UV) Green Lancers.

Kahinumduman sa miaging tuig, ang UC napilde sa UV og uno punto lamang, 60-61, ug duna pa gani kini purohan modaog ang Webmasters kun ugaling napasulod pa ang itsa ni Allen Abellanosa.

Sa gihapon, problema sa UC mao ang kakulang og lehitimong sentro, apan si Gomez malaumon nga ila kining masulbad ginamit ang ka-abtik ug ka-idlas sa iyang mga batos.

Sandigan ni Gomez sa ilang kampanya karon nga season mao silang Abellanosa, Aldeth Batobalonos, Orville Saludsod, Kenneth Sesante, Jared Kane Abatayo, Miguelito Ducay, Harold Ken Villanil ug Raymond Yncierto.

Samtang ang Wildcats ni coach Alex dela Torre maglaum sa abilidad nilang Sherwin Solis, Bryan Belicario, Juan Giron, Ariston Tiro, Rene Villarba ug Emilio Aniñon Jr.

Sa dili pa sugdan ang kumbati sa korte, usa una ka bonggang seremonyas ang ipahigayon nga seguradong ang gikahinaman na sab nga "Dance Palabas" maoy masentro sa atensiyon sa mga tumatan-aw.

Mga miyembro sa CESAFI Board nga gipangulohan sa maabtikong presidente Jose "Dodong" R. Gullas, ang executive vice president ug VP for finance sa UV, maoy nag-una sa listahan sa mga pinasidunggang dinapit sa programa karong hapon.