BILYAR……..Agresibong safety play

Makadaghan na kita makahisgot mahitungod sa safety play apan akong nasuta nunot sa pagpanglabay sa panahon nga daghan pa diay kitag angay hisgotan mahitungod niini. Una sa tanan, ang safety play dili angay himoon tungod lang kay gikinahanglan kini sa dula, kondili himoon kini sa tumang kaagresibo. Ang agresibong safety play usa sa maghatag og hugtanay-sa-bakos nga panagsangka. Sa panid 47 sa librong Snooker And Billiards si Ashok Kumar nagkanayon: "Leaving your opponent in deep trouble should be the goal of all safety play." Ang buot ipasabot ni Kumar sa iyang pag-ingon nga "deep trouble" mao ang pagpaningkamot nga dili mahatagan ang kontra og "scoring opportunity". Dili hatagan og higayon ang kontra nga makapasalir sa iyang preparasyon.

* * *

Sumala sa mga eksperto sa dulang billiard, kinahanglan nga ang magdudula adunay pihong tumong sa iyang pagpahigayon og safety play. May mga higayon nga ang plastada sa bola sa ibabaw sa lamesa ingon sa nag-awhag og safety play, apan kon imo na kining tun-an pag-ayo imong masuta nga haom diay kini sa imong preparasyon ug sa sitwasyon sa dula (pananglit, labaw ka og score.)

Nganong mo-safety pa man kon dili wala kaayo kinahanglana? Tungod ba lang sa kahadlok nga maka-score ang kontra ug maapsan ang imong puntos? Si Kumar miingon nga "It is not good enough to adopt a purely negative approach spoiling tactics designes just to keep your opponent from scoring."

Buot ipalungtad ni Kumar nga kon ang tumong sa magdudula sa paghimog safety play mao ra gyod ang pagpugong aron dili maka-score ang iyang kontra, dili kini maayo. Hinuon, mao kini ang nag-unang tumong sa safety play. Apan dili kay kutob ra diha. Kinahanglan nga taas og panglantaw ang magdudula. Dili lang kay ang pagpugong aron dili maka-score ang iyang kontra maoy tumong sa paghimog safety play, kondili aron usab maka-score siya sa sunod niyang turno sa pagtira. Mao kana ang batakan sa agresibong safety play. Kay kon ang magdudula magsigeg lang og pugong aron dili maka-score ang kontra apan wala sab siya makakamada og score, walay mahitabo sa iyang career.

* * *

(For comments and suggestions text at 0910-8105522 o mag-email sa [email protected])