Kahuyang

Bisan unsa kamaayong laki sa usa ka magdudula apan aduna gayoy departamento sa dula diin menos siya'g diskarte. Sa laktod nga pagkasulti, adunay kahuyang (weakness) ang matag bilyarista. Ug ang mga awtoridad bahin sa dulang bilyar mituo usab niini. Walay perfect player nga makapasiugdag perfect performance sa dula. Bisan ang mga banggiitan ug gikaintapang magdudula sa kalibotan may kahuyang usab. Ang ilang dinulaan "almost perfect" na, pero wala gayod mahipno nga "perfect."

Kini tungod kay wala man lagi tawo nga perfect, dili ba? Mao kini ang hinungdan nga ang tanang buhaton sa tawo dili gayod hipno. Ang importante mao nga makapasiugda siya'g impresibong performance nga makapatagbaw sa iyang kaugalingon ug sa mga tawo nga nag-idolo kaniya. Kini ang hinungan kon nganong ang magdudula kinahanglang magbansay kanunay. Si Ashok Kumar, inila ug respetadong sportsperson ug nakasulat og libro bahin sa billiards, miingon nga ang mga propesyonal nga magdudula magpadayon sa pagbansay bisan sa ila nang kahaniti tungod kay sila nagtuo nga "there are areas of the game where they can still improve."

* * *

Unsa man kining mga bahin sa dula nga angay pauswagon? Mao kini ang departamento diin may kahuyang ang magdudula.

Una sa tanan, kinahanglang makaamgo ang magdudula sa iyang kahuyang aron dali ra kining makorehian. Mas daku ang suliran kun iyang i-tolerate ang iyang mga sipyat ug dili makorehian ang iyang kahuyang. Si Alice Rim, respetadong billiard columnist sa website nga azbilliards.com. miingon: "Be sure to practice and improve those weaknesses so that somewhere in the future, you will only have more ammo in your pool arsenal."

Ang pagbansay sa magdudula aron pagpauswag sa iyang performance sa departamento nga may kahuyang ang iyang diskarte maoy pagpangandam dili sa karon, kondili sa umaabot nga mga sangka nga iyang pagasalmotan. Ang maayo ug utokan nga magdudula kanunay nagalantaw sa maayong kaugmaon sa iyang career.

* * *

(Text at 0910-8105522. E-mail:[email protected])