3 ka Sugbuanon nalakip sa RP diving team sa China

Tulo ka Sugbuanon ang nadala sa elite team diin ang Philippine diving team moadto sa China aron mag-ensayo sa umaabot nga Southeast Asian Games nga anhi ipahigayon sa Pilipinas karong Nobiyembre.

Sila si Andrea Marie Rafañan, Kevin Kromwel Kong ug Ralph Ronnel Deliarte, nga naglangkob sa RP diving team, mogikan paingon sa China karong Hunyo 20 uban sa 18 swimmers, 16 weightlifters, 12 gymnasts ug siyam ka wushu players.

Gikatakda silang mobalik sa Pilipinas unya sa Oktubre 15.

Ang 9-man diving team pangulohan ni 2004 Asian Cup silver medalist Zardo Domenios ug Niño Carog.

Si Rafañan, nakahig sa RP squad sa miaging tuig human kini milangkat og bulawang medalya sa gymnastics event sa Batang Pinoy ug sa Palarong Pambansa.

Nakampiyon usab siya dihang mirepresentar siya sa Cebu City ug Central Visayas sa mga regional ug national age-group competitions.