Menk, lulusot ba sa MVP award?

Maaari bang manalo si Fil-Am Eric Menk ng Most Valuable Player award?

Ito ang malaking katanungan ngayon sa Philippine Basketball Asso-ciation.

Nalalapit na ang annual achievement awards ng PBA sa pag-asara ng 2004-2005 season at isa sa mga kandidato ang Barangay Ginebra star na si Menk.

Awtomatikong kandidato para sa pinaka-prestihiyosong tropeo para sa individual players ang mga napiling Best Player of the Conference ng nakaraang apat na kumperensiya simula noong nakaraang taon at isa rito si Menk.

Ngunit sa kasalukuyan ay nasa listahan ng suspended players si Menk na nakabilang sa 20-manlalarong hinihingan ng mga orihinal na dokumento para sa records ng liga.

Hanggang ngayon ay hindi na pa nakakapagpasa si Menk na dahilan ng kanyang pagmi-miss ng pitong laro ng Gin Kings sa kasalukuyang Gran Matador PBA Fiesta Conference kung saan nahubaran sila ng titulo matapos sibakin ng Red Bull sa wild card phase.

Kasalukuyang nasa No. 2 ng statistical standing si Menk, may 58-puntos na layo sa nangungunang si Mark Caguioa na may kabuuang 1,882. statistical points.

Ngunit dahil sibak na ang Ginebra, may pag-asang makahabol ang pumapangatlong si Willie Miller na may 1,765.6 SPs na siyang nangungunang kandidato naman para sa Best Player of the Conference ng kasalukuyang kumperensiya dahil nakaabang na sa semi-finals ang kanyang koponang Talk N Text. Nakatakdang pagpulungan ng PBA officials ang isyung ito bago pa man magsimula ang botohan ng mga players, media at officials para sa seasons awards na gaganapin sa finals.

Habang sinusulat ang balitang ito, kasalukuyang naglalaban ang Alaska at Red Bull sa deciding Game-Three ng kanilang best-of-three quarterfinal series upang mabatid kung sino ang haharap sa San Miguel sa best-of-five semifinals na magsisimula sa Linggo.

Naitakda na ang best-of-five semis series ng Talk N Text at Shell na dumispatsa sa Purefoods matapos isara sa 2-0 ang kanilang best-of-three quarterfinal series. (Ulat ni Carmela V. Ochoa)