Bumangon ang Paint Masters sa kanilang mahinang simula at nagpa-malas ng eksplosibong laro para iselyo ang come-from-behind na panalo na nagsulong sa kanila sa 2-0 kalamangan sa best-of-five championship series na magpapatuloy sa Martes sa Cuneta Astrodome din.
Maalat ang naging simula ng Welcoat na inunahan ng 18-0 ng Jewels ngunit ibinuhos ng Wel-coat ang kanilang lakas sa ikaapat na canto kung saan nalimitahan nila ang Montaña sa limang puntos lamang kontra sa kanilang 22-puntos na produksiyon sa pangunguna ni Paolo Orbeta na umiskor ng kanyang walong puntos sa naturang yugto para makalapit sa titulo ang Welcoat.
Naupos ang 59-43 kalamangan ng Jewels sa kaagahan ng final quarter nang pakawalan ng Wel-coat ang 15-0 run upang agawin ang trangko, 61-59 mula sa layup ni Orbeta na kumumpleto ng kanyang steal, papasok sa huling tatlong minuto ng laro.
Nabawi agad ng Montaña ang trangko nang makakuha ng tatlong free-throws si Reed Juntilla na kanyang ipinasok lahat para sa 62-61 kalamangan ngunit ito na lamang ang kanilang huling oposisyon nang paigtingin ng Paint Masters ang kanilang depensa.
Umiskor si Leo Najorda ng basket at dalawang freethrows naman mula kay Fil-Am Anthony Washington para sa tatlong puntos na kalamangan ng Paint Masters, 1:35 minuto ngunit hindi rin naka-iskor ang Jewels sa kanilang mga krusyal na attempts, ang pinakahuli ay ang dalawang triple attempt ni Eric dela Cuesta na siyang tuluyang kumitil sa pag-asa ng Montaña. (Ulat ni Carmela V. Ochoa)