Ritual nagbida sa Express

ANTIPOLO City – Nagpaulan si Ren Ren Ritualo ng record na walong sunod na tres sa ikaapat na quarter upang ihatid ang FedEx sa 116-106 panalo laban sa Red Bull sa pag-usad ng PBA Gran Matador Fiesta Conference sa Ynares Center dito kagabi.

Matapos maglaho ang 24 puntos na kalamangan ng Express sa first half nang makalapit ang Barakos sa 75-77, nagsimulang mag-init si Ritualo na kumayod ng 27 sa kanyang tinapos na career-high 36 puntos upang panatilihing naka-distansiya ang FedEx tungo sa ikalimang panalo matapos ang 11-laro.

Ang 27-puntos ni Ritualo sa fourth quarter ay ang third all-time most ng local katabla si Allan Caidic sa likod ng 30-puntos ni Paul Alvarez at ang nangungunang 37 puntos din ni Caidic.

Ang walong sunod na tres kabilang ang bihirang four-point play na tinapos ni Ritualo sa pagselyo ng final score bago tumunog ang final buzzer ay tumabla sa all-time record para sa most consecutive three-pointers ni Caidic noong 1991.

Samantala, magpapatuloy naman ang aksiyon sa Cavite City tampok ang sagupaan ng Sta. Lucia Realty at Talk N Text sa San Sebastian Gym sa alas-4:30 ng hapon.