Gran Matador-PBA Philippine Cup: Shell magtatangkang bumangon

Tangka ng Shell Velocity ang panalong magbabangon sa kanila mula sa dalawang sunod na talo para muling solohin ang ikalawang posisyon laban sa matinik na Purefoods sa tampok na laro ngayon sa Gran Matador-PBA Philippine Cup sa Araneta Coliseum.

Matapos ang limang sunod na panalo, dalawang sunod na talo ang nalasap ng Turbochargers laban sa mga koponang nalagasan ng players na sangkot sa ‘Fil-sham scandal.’

Unang lumuhod ang Shell kontra sa Asi Taulava-less na defending champion Talk N Text, 63-80 at sinundan ito ng 90-94 pagkatalo kontra sa Red Bull na nawalan ng Davonn Harp at Mick Pennisi nito lamang Miyerkules.

Napapalayo na ang Turbo Chargers sa league leader na Phone Pals na may impresibong 8-1 record sa kanilang taglay na 5-3 kartada na katabla na ngayon ng kartada ng Barangay Ginebra at di naman nakakalayo ang San Miguel na may 5-4 record.

Kailangang manalo ngayon ang Shell sa alas-6:30 ng gabing laban kung ayaw nilang maungusan sa ikalawang puwesto ng Beermen na nakatakdang sumagupa sa Alaska sa pambungad na laro sa alas-4:00 ng hapon.

Kagagaling lamang ng San Miguel sa 88-82 panalo laban sa TJ Hot-dogs sa out-of-town game ng PBA sa Tacloban City at ito ang nais nilang sundan upang maagaw ang ikalawang puwesto. (Ulat ni CVOchoa)