PBA games hindi magiging sagabal sa 2005 SEAG

Matapos ipangako ni commissioner Noli Eala ang kanyang buong pagsuporta sa preparasyon ng bansa sa 2005 hosting ng Southeast Asian Games, pumayag ang pinuno ng PBA na iwasan ang competition schedule ng biennial meet.

Ito ang isa sa napagkasunduan nina Eala at dating Tourism secretary Roberto Pagdanganan, chairman ng Philippine SEA Games Organizing Committee (PHILSOC) kamakalawa.

Kinuha ni Pagdanganan si Eala na isa sa mga Board of Advicers na pinamumunuan ni Executive Secretary Eduardo Ermita, para tumulong sa promotion, marketing at management ng 2005 SEA Games.

"I’m sure with the vast knowledge of Mr. Eala in managing events like the PBA is a big boost for the success of the Games, " wika ni Pagdanganan. "Natutuwa ako at pumayag siya na ire-schedule ang mga games para hindi makasabay ang PBA games sa SEA Games."

Ang SEA Games ay nakatakdang ganapin sa Nobyembre 27 hanggang Disyembre 5 sa susunod na taon na makakasabay sa eliminations ng unang kumperensiya ng liga.

"Certainly, we will do everything in our capacity to be of service to the PHILSOC for the organization of the Southeast Asian Games," sagot naman ni Eala. "The PBA has offered its marketing capabilities and our players to spread some interests for the SEA Games and also the organization of the PBA in assisting in the actual holding of the SEA Games.

Ayon kay Pagdanganan, bahagi ito ng ‘volun-terism’ na siyang haligi ng matagumpay na hosting ng biennial meet.

"Volunterism is the heart and soul of the Games. We expect to invite 20,000 volunteers and Mr. Eala is one of them," wika ni Pagdanganan. (Ulat ni CVOchoa)