Tumapos ang 10-anyos na si So ng 8.5 puntos sa pagsasara ng nine-rounds upang makopo ang korona kung saan lamang ito ng dalawang puntos kontra sa mahigpit na kalaban na si Chung Juen Sen ng Singapore.
Nagbulsa rin si So ng ginto sa standard event matapos na makisalo sa unang puwesto sa isa pang Singaporean na si Terry Chua upang idagdag sa kabuuang limang ginto ng bansa.
Ang iba pang batang chessers na nagbigay ng ginto sa bansa ay sina Jan Nigel Galan nang kumubra ito ng dalawa matapos na mapagwagian ang individual rapid sa boys’ 10-under play, bago nakipagtambal kay Marc Christian Nazario para mapanalunan ang team event.
Ibinigay naman ng first-time international campaigner na si Jedara Docena ang nag-iisang ginto sa kababaihan matapos na dominahin ang rapid event sa girls’ 12-under class. Nag-uwi rin ang RP youth chessers ng pitong silvers at pitong bronze.