Maliban doon sa mga hindi pa nakakarating dito, lahat ng 34-man RP delegation, na pinamumunuan ni Chef de Mission Steve Hontiveros, ay dadalo sa seremonyas na suot ang track suits. Ang grupo ay maaring mag-imbita ng 30 panauhin at bibigyan ng special passes.
Ang seremonyas ay nakatakda sa ganap na alas-6 ng gabi.
Samantala, dumating na dito sina long jump specialist Lerma Bulauitan-Gabito at ang kanyang coach na si coach Joseph Sy, noong Lunes ng umaga mula sa Manila pero hindi kasama si Eduardo Buenavista na nagdesisyong idelay ang kanyang biyahe.
"He’s coming only on August 20," paliwanag ni Sy. "Mas gusto niyang mag-train sa atin."
Ang 4-foot-11 na si Buenavista ay kasali sa marathon na nakatakda sa Agosto 29 , ang huling araw ng 28th Olympic Games.
"We had a smooth flight," ani Buluaitan. "Pahinga lang muna ako ngayon and then umpisa na ng workout bukas."
Inaasahan ni Bulauitan na mai-improve niya ang kanyang personal best na 6.56M na mas mataas sa 6.52M na Southeast Asian Games record na hawak ni Elma Muros Posadas.
"The weather is not going to be a problem. Mukhang mas mainit pa sa atin. Sana, I can be in top condition when I compete," dagdag pa ni Bulauitan.