St. Jude Catholic School MYG overall champ

Ang pagdomina ng St. Jude Catholic School sa dalawang araw na swimming competition ay sapat na upang makopo ang overall title sa pagtatapos ng 3rd Manila Youth Games kahapon sa Rizal Memorial Sports Complex.

Sa dalawang araw na kumpetsiyon sa swimming Center noong Huwebes at Biyernes, humakot ang St. Jude Green Mariners ng 38-gold medals, 37-silvers at 35 bronzes.

Pinangunahan ng 10-anyos na si Jacquelyn Go ang kampanya ng St. Jude mula sa San Miguel sa pagsubi ng tatlong golds mula sa 25-meter freestyle, backstroke at breaststrokes.

Sapat na ang produksiyong ito para mapanatili ang No. 1 standing kasunod ang Dr. Albert Elementary School na humakot ng limang golds sa athletics competition kahapon, tatlo nito ay galing kay Emerlyn Illescas.

Ang 14-anyos na si Illescas ay naka-gold sa century dash, high jump at triple jump dagdag sa kanyang unang dalawang golds mula sa long jump at 400-m run para sa kabuuang 160-golds, 13-silvers at 14-bronzes ng Dr. Albert.

Ikatlo naman ang Youth Development Welfare Bureau II na may 14-10-4 gold-silver-bronze.

Sa pagtatapos ng tennis competition, dinomina naman ito ng kabataan ng Maynila District IV sa pangunguna nina Zhane Quitara at Marvin Serito.

Nagkampeon si Quitara sa 12-under singles, doubles at team event habang si Serito ay naghari naman sa 15-under singles, doubles at team event.

Dinomina rin ng Cheng Hua-Tondo ang 15-under, 12-under at 10-under category.

Nagsubi naman ang Legarda Elementary School ng tatlong gold sa badminton competition at dalawa sa Pagsanjan.