RP riders pa-Korea

Bitbit ang kumpiyansa ang RP-Casino Pagcor Trade Team ay aalis ngayon patungong Seoul, Korea para sumali sa Tour de Korea.

Ang 10-man delegation na binubuo ng apat na opisyal at anim na siklista ay aalis ngayong umaga sakay ng Korean Airlines at lalapag sa Seoul makaraan ang tatlong oras upang mabigyan ng sapat na oras ang mga riders na makapag-adjust sa racing condition.

Pangungunahan ni Rhyan Tanguilig ang kopo-nan na kabibilangan din nina team captain Victor Espiritu at silver medalist sa nakaraang 2003 Vietnam Southeast Asian Games, Lloyd Reynante, Alberto Primero, Ronald Gorantes at Victor Baluyut sa team na suportado ng PAGCOR Casino Filipino, TCL Television, Rudy Project, TnT Express Worldwide, UCPB Gen, New Balance Apparel at Pinarello Bicycle.

Bukod kay Carlos, ang iba pang team officials na kasama ay sina team manager Ric Rodriguez, coach Cezar Lobramonte at trainer at former national rider Norberto Oconer.