PBL Platinum Cup Finals: Tabla may Game 5 pa

Ipinakita ni Peter June Simon na karapat-dapat siyang Most Valuable Player ng kumperensiya nang humakot ito ng 28-puntos upang ihatid ang Fash sa 72-64 panalo laban sa defending champion Welcoat sa Game-Four ng kanilang PBL Platinum Cup sa Pasig Sports center kagabi.

Ito ang nagtabla ng best-of-five series sa 2-2 panalo-talo na nagbunga ng winner-take-all Game-Five na gaganapin bukas ng alas-2:00 ng hapon sa PhilSports Arena.

Ibinuhos ni Simon ang kanyang sama ng loob nang muling pasaringan ng mga fans na si Jojo Tangkay ang karapat-dapat na MVP sa pagka-mada ng 9-0 run na nag-angat sa Liquid Powers na di na muling lumingon pa.

Nakabawi si Simon sa kanyang pagkabokya sa Game-Three na ikinatalo ng Fash kung saan ininsulto ng ilang Welcoat players ang kanyang pagkapanalo ng MVP sa paglalagay ng ‘Tangkay MVP’ sa kanilang mga uniporme na ikinainsulto ni Chino Trinidad kaya nagbitiw ito bilang Commissioner na sumurpresa sa lahat.