PBL Platinum Cup Finals: Welcoat nakuha ang Game One

Eksplosibong opensa at mala-bakod na depensa ang ipinamalas ng Welcoat Paint upang iposte ang 78-60 panalo kontra sa Fash Liquid Laundry Detergent para makopo ang 1-0 bentahe sa pagbubukas ng kanilang best-of-five cham-pionship series para sa titulo ng PBL Platinum Cup kahapon sa Makati Coliseum.

Dinomina ng Paint Masters ang halos lahat ng departamento ng statistics na naging babala sa Fash para ma-sweep ang serye tungo sa pagsukbit ng kanilang ikaanim na titulo.

"Hindi ko akalaing ganito ang magiging resulta ng game na ito," wika ng winning coach na si Leo Austria ng Paint Masters.

Pinangunahan ni Ervin Sotto ang Welcoat sa pagposte ng 18 puntos na sinegundahan ni James Yap ng 14.

Isang 25-7 blast ang ibinaba ng Paint Masters na bumasag sa 48-pagtatabla ng iskor upang kunin ang 73-55 kalamangan na tuluyang umiwan sa Liquid Powers at di na nakabangon pa.

Sa unang laro, nakopo naman ng Blu Star ang konsolasyong ikatlong puwesto nang kanilang itakas ang 77-76 panalo laban sa Sunkist-UST.

Ang Game-Two ay gaganapin bukas sa San Juan gym sa ganap na alas-3:45 ng hapon. (Carmela Ochoa)