Liderato naagaw ng Qatar

CEBU CITY--Naging matatag sa huling bahagi ang Qatar-Ricor Mills upang pahiyain ang M. Lhuillier Kwarta Padala-Cebu, 70-67 noong Linggo at maagaw ang pangunguna sa 2003 Trust Classic National Open basketball championship sa New Cebu City Coliseum dito.

Nagpamalas ng impresibong performance si Daoud Daoud sa pagbangon ng Qataris sa huling dalawang minuto, ngunit mas umagaw ng pansin si Yaseem Ismael Mahmoud, ang 6-foot-8 ‘Dunker from Doha’, na siyang nagselyo ng panalo sa kanyang pinakawalang 3-point shot sa huling 29 segundo, 70-65 ang iskor.

Taglay na ngayon ng Qataris ang 2-1 kartada sa tourney na ito na sponsored ng Trust Classic, Waterfront Hotel-Cebu City, Cebu Visitors and Convention Bureau na pinangangasiwaan ni Patrick Gregorio, Plantation Bay, Air21, Panasonic, Gatorade, Spring Cooking Oil, Accel, Sunkist, Jealthy Options, Burlington, Hotel de Mercedes, Air Philippines, The Freeman, Sports Radio, Nature’s Spring Drinking Water, Ricor Mills, Baker’s Fair at Molten Basketballs.

Nauna rito, sinupil ng Chinese Taipei-Plantation Bay ang RP-Air21 sa huling minuto ng labanan upang itakas ang 91-85 panalo at makatabla sa record ng Lhuillier.