Agra vs Botor sa semis

Tinalo ng top-ranked na si Jessica Agra si Isabelle Culaba, 6-0, 6-0 kahapon upang maka-entra sa girls’ 16-under semifinals ng Futures Foundation Age-Group Tennis Cup sa Rizal Memorial Tennis Center.

Haharapin ni Agra ang third seed na si Julie Em Botor na nanalo ng default kontra Ivy Pringle kung saan ang two-weekend netfest na ito ay magbabalik sa Sept. 19.

Sa girls’ 12-under class, ginapi ng No. 1 na si Sarah Jane Lime si JV Custodio, 6-0, 6-1, pinabagsak naman ng No. 2 na si Jia Elesis si Kariz de Dios, 6-2, 6-2, ginulantang ni Zhane Quitara si Judy Em Botor, 6-0, 6-1, habang namayani naman ang No. 4 na si Joan Opulencia kay Irina Quinatadcan, 6-4, 6-0 upang kumpletuhin ang Final Four cast para sa susunod na round.

Sa iba pang laro, nagsipag-usad naman sa quarterfinal ng boys’ 12-under division sina No. 1 Patrick Arevalo, No. 2 Akio Sy, No. 3 Joseph Baldonado, No. 4 Edwin Olivarez, No. 5 Juan Gabriel Pena, No. 6 Kim Ivor Saraza, No. 8 Noel Agra at Kyle Cordero.