Taiwanese naisahan ng M. Lhuillier

CEBU CITY -- Bumangon mula sa 18 puntos na pagkakabaon ang M. Lhuillier-Kwarta Padala para hatakin ang 89-86 panalo laban sa Chinese-Taipei-Plantation Bay sa over-time ng ginaganap na 2003 Trust Classic National Open Championships sa New Cebu Coliseum.

Sumugal sa limang tao lamang si M.Lhuillier coach Raul ‘Yayoy’ Alcoseba nang gamitin lamang niya sina Dar-ryl Smith, Woodrow Enriquez at imports Bobby Parks, Corey Brown at Geremy Robinson sa final half at extra period.

Nagbunga ang kanyang pagsusugal nang itala nila ang panalo laban sa pagod nang Taiwanese sa torneong ito na may patnubay ng BAP at itinataguyod ng Trust Classic, Waterfront Hotel-Cebu City, Cebu Visitors and Convention Bureau , Plantation Bay, Air21, Panasonic at Gatorade.

Ang panalo ay nagbigay sa Cebuano ng solo liderato na may 2-0 baraha sa event na inorganisa ng National Basket-ball League at suportado din ng Accel, Sunkist, Healthy Options, Burlington Performance Socks, Hotel de Mercedes, Air Philippines, The Freeman, DZSR Sports Radio 918Khz, Nature’s Spring Drinking Water, Ricor Mills, Spring Cooking Oil, Baker’s Fair at Molten Basketball.

Nauna rito, nakabawi ang Burlington-NBL sa kabiguan mula sa Qatar nang igupo nila ang RP-Air21, 80-70.