Hapee di umubra sa US Selection

Masyadong malakas ang USA-Bingo Bonanza para sa Hapee Toothpaste nang ilampaso nila ito sa iskor na 103-76 kahapon sa PBL-RP-USA Goodwill Series sa San Juan Gym.

Pinamunuan ni 6’5 Will Levy ang Americans sa kanyang naitalang 22 puntos, 12 rebounds at 2 assists upang makabalik ang US mula sa 84-89 kabiguan kontra sa RP Team noong Sabado.

Nagdagdag naman ng 19 puntos, 10 assists at 2 rebounds si Brando Payton pero si Gary Di Grazia ang nagtakda ng tempo sa one-sided affair nang magdeliver ito ng 10 puntos sa kanyang kabu-uang 15 puntos sa first quarter lamang.

Pinamunuan ni Di Grazia ang 7-0 run at mula dito kinontrol na ang tempo ng laro.

Nauna rito, nilimitahan ng LBC-Batangas ang John-O sa isang basket lamang sa final na apat na minuto upang iposte ang 72-67 panalo.