Ikaanim na sunod na panalo asam ng TnT National Pool-A

Ikaanim na sunod na panalo ang sisikaping maipinta ng Talk ‘N Text National Pool A sa kanilang nakatakdang pakikipaglaban kontra Sta. Lucia-CUSA sa Bert Lina Six-Feet-and Above Junior Cup best-of-3 showdown sa Lyceum gym ngayon.

Sa labang ito, umaasa ang tropa ni coach Johnny Tam na magagawa nilang masungkit ang inaasam na panalo na siyang maglalapit sa Phone Pals sa titulo bunga ng kanilang mas mataas na morale kung saan ang kanilang mga nakakalaban ay kanilang tinatalo ng hindi bababa sa 28 puntos na bentahe.

Pero hindi minamaliit ng Phone Pals ang kapasidad ng Junior Realtors.

Gaya ng dapat asahan, muling sasandigan ng Phone Pals ang mga balikat nina Jonathan Fernandez, Michael Galinato at Edwin Asoro na siyang gumiba sa Shell-UCAA sa semifinals, 103-82 upang makapasok sa championships round.

Nauna rito, maghaharap ang Shell-UCAA at ang Red Bull National Pool B sa alas-3 para sa ikatlong puwesto.