Cebu teams nagpalakas ng line-ups para sa PBL-CBL dual meet bukas

Makaraan ang kanilang pakikipagtagisan ng lakas sa mga PBL teams noong nakaraang buwan, muling pinalakas ng Cebu teams ang kanilang line-ups na pawang binubuo ng mga mahuhusay na manlalaro upang tuluyan ng mapagwagian ang korona ng second phase ng PBL-CBF Dual Meet na magbubukas bukas sa University of San Carlos Gym.

Kinuha ng Casino Rubbing Alcohol, tumapos ng ikatlong puwesto kontra sa Blu All Purpose sa Pasig City si Jan Montalbo mula sa Cebuana Lhuillier at Gilbert Castillo upang makapagbigay ng malaking suporta mula kina Lito Celiz, James Relampagos, Ronald Paraiso, Chris Guerrero at Ruel Buenaventura.

Pinapirma naman ng General Milling Corporation-Granny Goose Tortillos ang apat na cagers na may malalim na karanasan sina Johnedel Cardel, Alfie Grijaldo, pointguard Aldrich Reyes at Bernard Tanpua at umaasa sila na madadala ang koponan sa finals sa tulong ng mainstays na sina Sonny Toring, Ron Randolf Mutia, Romeo Clar Jr., Dennis Cabigkis at Alex Cainglet.

Kakampanya naman sa Skygo sina Michael Manigo, Michael Etrata at Ronald Quinahan upang makatulong nina Jercules Tangkay, Alano Caputolan, David Cabrera, Cesar Romero at Leif Villarin.

Bukod kay Montalbo, babandera rin sa Cebuana Lhuillier sina Max Delantes, Dennis Lim, Jojo Maglasang, Baltazar Jueves at Stephen Padilla.

Ang pitong koponan ay maghaharap-harap sa single round robin series na ang top four squad ang siyang magqu-qualify sa crossover semis. Ang mananalo sa crossover semis ang magkikita naman sa Finals.