FEU belles lumapit sa sweep

Dinispatsa ng Far Eastern University ang National University, 25-11, 25-16, 25-13 noong Linggo upang iposisyon ang tangkang sweep sa elimination at mapanatili ang kanilang women’s volleyball crown sa 65th UAAP season.

Nangailangan lamang ang Lady Tamaraws ng 42 minutos upang iposte ang malinis na 13 panalo kung saan ang tanging magiging hadlang na lamang nila sa kanilang landas ay ang Adamson University na kanilang makakalaban sa pagtiklop ng eliminations sa Linggo para tuluyan ng masungkit ang korona.

Ang koponan na nagtala ng sweeps sa 14-game double-round eliminations ang awtomatikong idedeklarang champion sa UAAP volleyball. Ang isang kabiguan ay magreresulta ng crossover semifinals at race-to-two finals.