PBL-CBF dual meet

Apat na koponan ang magtatagisan ng kani-kanilang talento kontra sa apat na Cebuanong koponan sa nalalapit na Philippine Basketball League-Cebu Basketball Confederation (PBL-CBF) Dual Meet na nakatakda sa Setyembre 16-23 sa Pasig Sports Center.

Pangungunahan ng Blu Detergent Kings na nagbulsa ng 2002 PBL Chairman’s Cup runner-up place ang kampanya ng PBL para sa korona sa pagparada ng kanilang intact na line-up na babanderahan ng expros na sina Allan Gamboa at Mike Garcia.

Ang tatlong iba pang PBL teams ay ang Montana Jewels, John-O at Regent Cheese Ball-Shark.

Ang kampanya ng Cebuano para sa korona ay pangungunahan ng Hapee Toothpaste-Cebu kasama ang General Milling Corporation, Metro Skygo Forwarders at Casino Rubbing Alcohol.

Hindi na bago para kay Blu coach Leo Isaac ang klase ng laro ng Cebuano nang kunin ng Detergent Kings ang 1st PBL-CBF Challenge Cup.

Malakas na hamon para sa Blu ang Hapee-Cebu na kinuha ang serbisyo ng ilang manlalaro mula sa nabuwag na MBA.

Maging ang Metro Skygo at General Milling Corporation. Nakuha ng Skygo ang CBF Summer League title at Gillimac Cup habang ang General Milling na dadalhin ang kulay ng Granny Goose Tortillos ay pioneer champion sa CBF Charter Cup.

Ang Casino Rubbing Alcohol naman, ang crowd-drawer noong PABL days ay umaasang maibabalik ang mga nakaraang matagumpay na panahon.