Malaysia pinahirapan muna ng Pinoy 5 bago nanalo

KUALA LUMPUR-Kinailangan ng Malaysia na dumaan sa butas ng karayom bago nila napayukod ang Team Burlington-Philippines, 57-55 sa 3rd Southeast Asia Basketball (SEABA) Junior Men’s Championship sa MABA Gym dito.

Binigyan ng Filipinos ang Malaysians ng mabigat na hamon bago naitakas ang kanilang panalo sa pagsasara ng 18-year-and-under biennial meet na ito.

Nagkaroon ng tsansa ang RP-5 na madala ang laro sa overtime, subalit pumaltos ang jumper ni Jerson Torculas gayundin ang follow-up ni Jayfelson Agbayani kasabay ng pagtunog ng buzzer.

Tumapos ang Filipinos ng ikaapat na puwesto sanhi ng kanilang 1-3 record kung saan ang natatanging panalo ng Nationals ay mula sa mga kamay ng Singapore, 98-43.

Inaasahan na madaling maipapanalo ng Malaysia ang kanilang laban matapos na tambakan ang Singapore ng 82 puntos, 21 ang Indonesia at 12 naman ang Thailand para sa kanilang kauna-unahang panalo sa tournament na huling ginanap sa Indonesia noong 1998 kung saan ang Philippines ang siyang nag-uwi ng kampeonato.

Nakopo ng Malaysia at Thais, na tumapos naman ng ikalawang posisyon bunga ng kanilang 66-39 tagumpay laban sa Singaporeans sa penultimate game, ang karapatang katawanin ang rehiyon sa ABC Junior Men’s Championship sa Disyembre.