3 golds ibinulsa ng Pinoy karatekas

Nag-uwi ang lima kataong delegasyon mula sa AAK Team Philippines ng tatlong medalyang ginto, 3 pilak at dalawang tanso sa katatapos pa lamang na International Open Juniors Karatedo Championships sa Mackenzie Sports Center, British Columbia, Canada.

Ang mga nagsipagbulsa ng ginto ay ang 7-anyos na si David John Paulo Israel ng Don Bosco, Sta. Mesa sa 7-8 years old Kumite; 9-anyos Ruski Emrick Sunga-lon ng Claret School, 9-10 yrs.old at 13-gulang na si Kenneth Jimenez ng Lourdes School-Mandaluyong sa 13-14 yrs. old Kumite. Ang tatlong nabanggit ay pawang nagsi-pagpanalo ng kani-kanilang laban kontra sa mga Japanese rivals.

Dalawang silvers ang ambag ng 13-gulang na si Jert Stephen Yao ng Xavier School sa 13-14 category Kata at sa 15-17 yrs. old Kumite. Natalo ang kanyang Kumite finals kontra Canadian na kalaban. Ang ikatlong silver ay mula pa rin kay Israel, habang sina Sungalon at Jimenez ang nagbulsa naman ng tanso sa 9-10 yrs. old Kata at 13-14 yrs. old Kata, ayon sa pagkakasunod.

Kabilang sa mga bansang sumabak sa tournament na ito ay mula sa Japan, USA, England, Australia, New Zealand, India, Switzerland, Thailand, Kazakhstan, Bangladesh, Fiji, South Africa, Brunei, Philippines at host country Canada.