Ana Freezers lusot sa kutitap

Sumandal ang Ana Freezers sa kanilang nakaraang tagumpay upang ilista ang ikalawang panalo matapos ang 79-73 pananalasa kontra sa Kutitap Toothpaste sa pagpapatuloy ng eliminations ng PBL Chairman’s Cup sa Caruncho Gym sa Pasig City.

Naging matatag ang Freezer Kings sa huling bahagi ng labanan upang iangat ang kanilang record sa 2-4 panalo-talo karta at ipalasap sa Teeth Sparklers ang kanilang kauna-unahang kabiguan matapos ang dalawang sunod na tagumpay.

Abot-kamay na ng Ana ang kanilang panalo matapos ang 75-68 pangunguna patungo sa huling 35 segundo ng labanan ngunit nagbanta ang Kutitap na nanatiling buhay ang pag-asa sa panalo matapos ang triple ni Jaymar Rivera at Mark Saquilayan at nagbababa sa apat na puntos na kalamangan ng Freezer Kings, 75-71 27 segundo na lamang ang nalalabing oras. (Ulat ni Carmela V. Ochoa)