Morano, PBAPC Player of the Week

Nagposte si Ato Morano ng kanyang career-high sa Philippine Basketball Association at pagkatapos nito’y umiskor ng mahalagang triple upang ihatid ang Coca-Cola Tigers sa dalawang sunod na panalo sa kasalukuyang Samsung Governors Cup.

Tumapos si Morano ng 17-puntos, kabilang ang impresibong 5-of-7 three-point shooting upang suportahan si import Rossell Ellis sa kanilang 96-77 pananalasa sa Batang Red Bull noong Abril 4 sa Makati Coliseum.

Pumukol naman ito ng krusiyal na tres sa huling 37 segundo ng labanan upang kumplementuhan ang eksplosibong paglalaro ni import Ron Hale na naglaro kahit di pa nawawalan ng epekto ng simpleng kaso ng food poisoning.

Ang tres na ito ang naging tuntungan ng Tigers sa kanilang 70-66 panalo kontra sa RP Team -Selecta na nagbigay sa Coca-Cola ng kanilang ika-pitong panalo sa 10-pakikipaglaban.

Dahil dito, si Morano ang naging boto ng lahat ng mga miyembro ng PBA Press Corps na kumokober ng mga laro, para sa Player of the Week citation para sa linggong Abril 1-7.

Dahil sa panalong ito ay posible na itong magkaloob sa Tigers ng twice-to-beat ticket sa 8-team quarterfinal phase ngunit para wala na itong kawala ay kailangan na lamang nila ng isang panalo para ma-pormalisa ito.

Si Morano ay sumikat sa Metropolitan Basketball Association bago ito kunin ng Coca-Cola sa PBA. (Ulat ni Carmela Ochoa)