Umalagwa si import Derrick Brown sa ikaapat na quarter sa paghakot ng 15 puntos sa kanyang tinapos na 26 puntos at inalat naman ang Beermen sa mga krusiyal na basket na siyang nagkaloob sa TJ Hotdogs ng ikalimang panalo sa anim na pakikipaglaban.
Bunga ng panalong ito ng TJ Hotdogs, halos nakakasiguro na ito ng puwesto sa eight-team quarterfinal round at kailangan na lamang nito ng isang panalo upang ipormalisa ang kanilang pagsulong sa susunod na round.
Nasayang ang naipundar na 13-puntos na kalamangan ng Beermen, 57-44 sa ikatlong quarter nang unti-unti itong napudpod sa final canto sanhi ng kanilang ikaapat na pagkatalo sa 6- laro.
Buhat sa 60-40 kalamangan ng San Miguel, umaatikabong 21-8 pro-duksiyon ang pinakawalan ng Purefoods upang agawin ang trangko sa 69-68 mula sa dalawang free throws ni Brown papasok sa huling dalawang minuto ng laro.
Agad namang nabawi ng SMB ang pangunguna mula sa basket ni import Lamont Strothers, 70-69 ngunit nakahugot ng foul si Brown mula kay Dwight Lago upang ibalik ang bentahe sa Purefoods sa 71-70, may 39.4 segundo na lamang sa laro. (Ulat ni Carmela V. Ochoa)