2nd Philspada-Rotarympics magsisimula sa Abril

Mahigit sa 800 iba’t ibang atletang may kapansanan at opisyal mula sa buong bansa ang magpapakita ng aksiyon sa 2nd Philspada-Rotarympics 2002 National Games na nakatakda sa Abril 5-8 sa UP Diliman campus at sa PhilSports Complex sa Pasig City.

Ang naturang event ay magkatulong na inorganisa ng Rotary Club of Diliman sa pangunguna ni Lourdy Torres at Philspada sa pangunguna naman ni Mike Barredo at hatid ng Nestle Philippines, Portal at Philippine Sports Commission.

Inihayag ni Barredo na naging panauhin kahapon sa PSA Forum na hatid ng Agfa at Red Bull sa Holiday Inn at Diliman Rotary officials Alex Cureg, Steve Robles at Ric del Castillo na ang mga nagwagi sa National Games ang siyang kasama sa pool of athletes para sa international competitions, kabilang ang Asia Pacific meet matapos ang Busan Asian Games sa Korea ngayong Setyembre.

Ang mga events na paglalabanan ay ang 21K wheelaton, basketball on wheels, soccer, throwing contest, track races, swimming, judo, volleyball, showdown at tennis.