Andersson, kampeon sa ITF-RP netfest

Naglabas ng pamatay na porma ang third seed Daniel Andersson ng Sweden kahapon upang ma-sweep ang dalawang yugto ng $15,000 Truflex ITF Philippines Men’s Futures sa Rizal Memorial Tennis Center.

Armado ng malalakas na serbisyo at steady baseline game, tinalo ng 24-anyos netter mula sa Stockholm ang fifth seed Benjamin Cassaigne ng France, 6-2, 6-4 para sa kanyang ikaapat na korona.

"I played great today. I served well and returned well," pahayag ng world No. 387 na si Andersson, na nanalo rin sa Florida California at Jamaica.

Na-sweep ng tambalang Hiroki Kondo ng Japan at Wang Yeu-Tzuoo ng Taiwan ang doubles titles makaraang iposte ang 6-4, 6-4 panalo kontra sa pareha nina top seeds Dirk Stegmann at Coenie Van Wyk ng South Africa.