Welcoat kontra Shark

Pagbangon mula sa kanilang huling kabiguan ang aasintahin ng Welcoat Paints sa kanilang nakatakdang pakikipaglaban kontra sa defending champion Shark Energy Drink sa pagpapatuloy ngayon ng 2001 PBL Challenge Cup sa Makati Coliseum.

Nakatakda ang paghaharap ng House Paints at Power Boosters sa alas-5:30 ng hapon matapos ang sagupaan sa pagitan ng Montana Jewels at Ana Freezers sa alas-3:30.

Inaasahan na muling mabubuhay ang mainit na rivalry ng House Paints at Power Boosters kung saan kapwa naghaha-ngad sila na maisubi ang ikaapat na panalo upang patuloy na makasosyo sa liderato.

Nadungisan ang katayuan ng Welcoat nang kanilang matikman ang 75-80 kabiguan sa mga kamay ng Blu Detergent noong nakaraang Nov. 22 dahilan upang malaglag sila sa ikalawang puwesto kasalo ang La Salle na may 3-1 kartada sa likod ng lider na Blu na nag-iingat naman ng 4-1 karta.