Sosyo sa liderato asam ng ICTSI-DLSU

Ang makabangon mula sa dalawang sunod na kabiguan ang nais na maisakatuparan ng defending champion Shark Energy Drink, habang pupuntiryahin naman ng ICTSI-La Salle ang kanilang ikatlong sunod na panalo upang makasosyo sa liderato sa nakatakdang dalawang laro ngayon sa kasalukuyang PBL Challenge Cup sa Makati Coliseum.

Makakaharap ng Power Boosters na may 1-2 win-loss slate ang wala pa ring panalong Ateneo-Pioneer sa alas-3:30 ng hapon, habang maghaharap naman ang ICTSI Archers at Montana Pawnshop sa alas-5:30 ng hapon.

Ang Ateneo-Pioneer at Shark ay galing sa dalawang huling pagkatalo kaya’t inaasahan na eksplosibong opensa ang kanilang ihahataw upang tabunan ito.

Matapos ang kanilang debut na panalo, 75-65 kontra sa kanilang sister-team Blu, dalawang sunod na minalas ang Power Boosters, una ng yumukod sila sa Ana Freezers, 67-72 noong Nov. 8 at sumunod sa Kutitap Toothpaste, 66-77.

Di rin naging maganda ang unang laro ng Blue Eagles Insurers nang matikman ang 70-75 pagkatalo sa mga kamay ng Montana noong nakaraang Huwebes na sinundan ng 82-92 dagok kontra Ana Freezers noong Sabado.

Ang panalo ng ICTSI Archers ang maglalagay sa kanila sa pakikisosyo sa liderato sa pahingang Welcoat Paints na may malinis na 3-0 record.