MBA 2nd Phase: Batangas kontra San Juan

Isang mahigpit na hamon ang nakatakdang harapin ngayon ng lider na Batangas sa kanilang nakatakdang paghaharap ng San Juan sa pagpapatuloy ng MBA Second Phase na ang aksiyon ay bibisita sa Lipa City.

Tangka ng Blades na maipaghiganti ang kanilang nalasap na 82-86 kabiguan ng una silang magharap ng Knights sa kanilang pang-alas-5:30 ng hapong duwelo sa La Salle Lipa Sentrum upang mapatatag ang kanilang kapit sa solong liderato sa Northern Conference.

Inaasahang isasalang ni coach Nash Racela sina Rommel Adducul, Alex Compton at Eddie Laure upang trangkuhan ang kampanya ng Blades at mapaganda ang kanilang kasalukuyang 8-1 panalo-talo karta.

Ngunit ito ay siguradong tatapatan nina Chris Calaguio at Bruce Dacia na siyang mamamahala naman sa opensa ng Knights, dagdag pa rito ang suporta nina Chito Victolero at ng twin towers na sina Omanzie Rodriguez at Rafi Reavis.

Nauna rito, nais naman ng Socsargen-Taguig na maduplika ang kanilang 122-116 panalo sa kanilang unang paghaharap ng Davao sa alas-3 ng hapon.