NCAA Basketball Championships: Sudden death naipuwersa ng JRU vs San Sebastian

Naipuwersa ng Jose Rizal University ang do-or-die na Game-Three matapos ang 95-81 panalo sa Game-Two ng Finals ng NCAA men’s basketball tournament sa Rizal Memorial Coliseum kahapon.

Matapos malasap ang 74-77 pagkatalo sa pagbubukas ng best-of-three series noong Huwebes, bumuwelta ang JRU Heavy Bombers upang itabla ang serye sa 1-1 panalo-talo at itakda ang deciding Game Three sa Martes.

Sa juniors division, dinala rin ng San Beda Red Cubs sa winner-take-all match ang final series kontra sa Letran Squires matapos iposte ang 80-70 panalo sa Game-Two ng kanilang sariling best-of-three series.

Pinangunahan ni Ernani Epondulan ang Heavy Bombers sa paghakot ng 26 puntos, 7-rebounds at 2-steals. Si Epondulan ang nagpasimuno ng pag-arangkada ng Jose Rizal sa ikalawang quarter at di na muling lumingon pa.

Pinangunahan ni Epondulan ang eksplosibong 26-8 run ng Bombers upang makaahon mula sa 6-point deficit at iposte ang 47-35 kalamangan sa pagsapit ng halftime mark.

Kinakitaan ng determinasyon ang Baste na tapusin na ang laban nang kanilang ilapit ang iskor sa 51-58, ngunit hindi naman nagpabaya ang kampo ng Bombers nang muli nilang ilayo ang kalamangan at iposte ang pinakamalaking kalamangan na 89-71 na kanilang naging tuntungan sa tagumpay.

Katulong ni Epondulan ay si Philip Finuliar at Villarin na nagposte ng 14 at 11 puntos, ayon sa pagkakasunod para sa Jose Rizal.