Rizal Tech. hiniya ng St. Benilde

Hiniya ng College of St. Benilde ang Rizal Technological University, 62-22 upang manatiling malinis ang katayuan matapos ang apat na laro, habang nakaligtas rin ang Lyceum of the Philippines sa Collegio de San Lorenzo, 43-33 sa ginanap na WNCAA basketball tournament sa Lyceum gym noong Linggo.

Ang ikinamadang 4-0 record ng Lady Blazers ang nagpatatag ng kanilang kapit sa solong liderato, kabuntot ang University of Assumption (Pampanga) na may 4-1 karta at ang Lyceum na nasa ikatlong puwesto na nag-iingat ng 3-1 record.

Itinala naman ng St. Scholastica’s College ang kanilang kauna-unahang panalo matapos na gapiin ang Siena College, 31-27.

At sa high school division, sinagpang ng De La Salle-Zobel ang kanilang ikaapat na tagumpay sa pamamagitan ng 53-50 pamamayani kontra sa Miriam College, habang pinabagsak ng St. Scholastica’s College ang Chiang Kai Sek College, 54-26 sa isa pang high school game.