Batangas Blades nais paghigantihan ang San Juan

Paghihiganti ang nasa isipan ng Batangas Blades sa kanilang nakatakdang pakikipaglaban kontra sa San Juan Knights sa alas-5:30 ng hapong sultada sa pagbubukas ngayon ng kanilang best-of-three semifinal series ng MBA sa Sentrum De La Salle Lipa.

Determinado ang Blades, na lumasap ng 63-84 pagkatalo sa balwarte ng Knights noong Hulyo 29, na maipaghiganti ang kabiguang ito sa kanilang sariling lupain na ang kanilang panalo ay maglalapit sa kanila sa pinto ng kauna-unahang finals appearance.

Sa kabila nito, sisikapin naman ng Negros Slashers na mapanatiling matatag sa kanilang balwarte sa pakikipagtipan naman sa Cebuana Lhuillier sa ganap na alas-3 ng hapon para sa sarili din nilang best-of-three semifinals series na dadako naman sa St. La Salle Gym sa Bacolod City.

Samantala, nasorpresa si MBA Commissioner Ogie Narvasa sa mga lumabas na ulat sa mga pahayagan sa pagsusumite ng MBA team selection sa Kuala Lumpur Southeast Asian Games organizers at idiniin nito na dinisbanda na ng liga ang nasabing koponan na nanalo na Southeast Asian Basketball Association (SEABA) championship.

Ipinahayag din ni Narvasa na ang mga players ay kanila ng pinabalik sa kani-kanilang mga mother squad sa dahilang ayaw nilang masangkot ang mga manlalaro sa away pulitika ng dalawang lider sa pagitan ng Basketball Association of the Philippines (BAP).