Huling tiket sa semis nakuha ng Assumption

Nanaig ang galing ng University of Assumption-Goldilocks nang maungusan nila ang Spring Cooking Oil sa isang mahigpit na salpukan kahapon sa iskor na 68-65 upang maokopahan ang hu-ling ticket sa semifinals sa pagtatapos ng quarterfinal round ng 1st Crystal Spring-PYBL Title Cup sa Makati Coliseum.

Simula pa lang sa unang canto ay kapwa naglabas na ng mahigpit na laban ang dalawang koponan kung saan nagtala ng 12 puntos na kala-mangan ang Cake Experts, 28-16 na agad din namang binawi ng Oilers sa pagbubukas ng second quarter nang gumawa ito ng 20-5 atake upang itala ang 3 puntos na lamang, 36-33.

Subalit naiselyo ng Cake Experts ang kanilang pangunguna sa magkasunod na basket sa pagsasara ng naturang quarter.

At sa third canto, higit pang nag-init ang mga kamay ng Cake Experts nang kanilang palobohin ang kalamangan sa 56-48 sa pangunguna ni Welihado Duyag na nagtala ng 18 puntos at 11 rebounds. (Ulat ni Carol Fonceca)