Mayor, Atienza, dinomina ang 6th leg ng PEACE chessfest

Muling nakopo ng dentistang si Jenny Mayor ang pangunguna sa kalagitnaan ng 2001 Philippine Executive Active Chess Express o PEACE 2001 sa Harmony section, habang nasungkit ni Cyrus Atienza ng Land Bank ang 24 puntos na kalamangan sa Serenity section.

Binanderahan ni Mayor ang elite group sa kanyang nalikom na 96 puntos patungo sa ikapitong yugto sa Abril 28 sa Land Bank’s Multi Purpose Hall sa Gil Puyat Ave., Makati City.

Nagposte si Atienza ng 104 puntos na bentahe upang ungusan sina Gunnar Abelido na may 80 puntos, Ramil Acosta at Raul Villarete na may 72 at 71, puntos ayon sa pagkakasunod.

Kabilang naman sa top 10 sa Harmony section sina Dennis San Juan (93); Douglas Peña (92); Gary Legaspi (86); Romel Asoque (78); Ed Orozco (69); Jose Aspiras (65); Tyrone Guya (65); Leodegario Ricaña (60) at Antonio Santos (56).