Zamboanga wrestlers, dinomina ang National Open

Pinayukod ng Zamboanga City ang defending champion Philippine Army upang dominahin ang dalawang araw na First Quarter National Open Wrestling Championship na nagtapos kahapon sa Rizal Memorial Wrestling Gym.

Humakot ang Zamboanga wrestlers ng pitong ginto, walong pilak at apat na tansong medalya kung saan bumandera ang batang si Margarito Angana na nagbulsa ng tig-dalawang ginto at pilak.

Sumablay lamang ang Philippine Army ng tatlong tanso upang mawala sa kanilang mga kamay ang hawak na titulo matapos na maitabla nila ang pitong ginto at pilak ng Zamboanga.

Tumersera ang Las Piñas Wrestling Club sa kanilang ipinosteng 6-2-5 sa tournament na ito, habang tumapos naman ng ikaapat na puwesto ang Philippine Air Force sa kanilang 5-5-4 medal output.