Susuporta pa rin ang PBL sa national team

Kahit wala pang desisyon ang Malakanyang sa apela ng PBL na baguhin ang ruling ng Games and Amusement Board, ibinigay pa rin ng liga ang kanilang buong suporta sa bansa sa pamamagitan ng fund-raising program para sa pagsasanay ng national team.

Nagbigay si PBL Chairman Dioseldo Sy ng seed money na P1 milyon buhat sa kanyang sariling bulsa sa likod ng kanilang problema sa GAB na nagsabing ang PBL ay isang professional league matapos itong iapela ng Basketball Association of the Philippines.

"Tama si Kuya (BAP Chairman Lito Puyat) that we should set aside the differences and look forward to the betterment of Philippine Basketball," pahayag ni PBL Commissioner Chino Trinidad sa lingguhang PSA Forum na ginanap sa Holiday Inn kahapon.

Si Trinidad ay kinilala ni BAP president Freddie Jalasco bilang board director ng BAP executive committee na mangangasiwa ng long term program para sa basketball lalo na ang preparasyon para sa SEA Games.