Alpuerto, Dandan, mag-aagawan sa korona ng Manzano Cup

Kapwa iginupo nina No. 1 Jasper Alpuerto at ng second pick Kyle Dandan ang kani-kanilang kalaban upang itakda ang kanilang paghaharap sa korona ng boys’ 12-under division ng third Manzano Cup Age-Group tennis tournament sa Rizal Memorial Tennis Center.

Pinatalsik ng Laguna-based na si Alpuerto ang third seed na si Raymond Villarete, 6-2, 7-5, habang tinalo naman ni Dandan, isang grade-five student sa Colegio de San Agustin ang fourth seed na si Pablo Olivarez II, 6-4, 6-3.

Sa iba pang laban, nag-poste naman sina top seeds Johan Guba at Christian Cuarto ng impresibong panalo upang pamunuan ang cast ng mga semifinalists sa kani-kanilang division.

Pinayukod ni Guba ang seventh seed na si Bernardine Alpuerto, 6-2, 6-0 sa boys’ 18-under class.

Umusad din sina No. 2 JR Moreno na nanalo ng default kontra Dino Paul Ferrari at No. 4 Ghandi Matubog na nagtala naman ng 6-3, 6-2 pamamayani laban sa No. 6 na si Carlo Manalastas.