Ortuno kampeon sa ITF-Phil. Women's Futures

Ibinulsa ng top seed Spanish Alicia Ortuno ang singles title nang kanyang igupo ang No. 2 na si Chae Kyung-Yee ng Korea, 5-3, 4-0, 4-2 kahapon sa $10,000 Union Cement International Tennis Federation-Philippine Women’s Futures Week 2 sa Rizal Memorial Tennis Center.

Tinanggap ng world’s No. 297 na si Ortuno, nanalo ng kanyang unang titulo nga-yong taon ang $1,600 cash at limang WTA Women’s Tennis Association) points.

Sa iba pang laban, pinabagsak naman ng tambalang top seeds Rushmi Chakravarthi at Jayaramsai Jayalakshmy ng India ang pareha nina Saeki at Remi Uda ng Japan, 5-3, 4-1, 4-2 upang sungkitin ang korona ng doubles event na ito na suportado ng ITF Grand Slam Development Fund, Phinma Group of Companies, PSC, Wilson balls, Manila Midtown Hotel at Viva Mineral Water.

Samantala, umusad naman ang mga locals na sina Ronald Paz, Jesse Lapore at Johan Guba sa second round ng qualifying tournament ng kauna-unahang yugto ng ITF-Philippines Men’s Futures na magsisimula sa Nov. 28.