Japanese netter pasok sa finals

Inihakbang ng Japanese netter na si Miho Saeki ang kanyang mga paa tungo sa finals ng Union Cement International Tennis Federation-Philippine Women’s Futures Week 1 sa pamamagitan ng 1-4, 4-2, 4-1, 1-4, 5-4 (3) pamamayani kontra sa Indian teenager na si Shruti Dhawan kahapon sa Rizal Memorial Tennis Center.

Matinding hamon ang ibinigay ng 24-gulang na tubong Tokyo at nasa kanyang kauna-unahang tournament matapos ang isang taong pamamahinga sanhi ng injury sa bukung-bukong sa kalabang si Dhawan, ang nangungunang junior netter ng India na naga-wa ring makipagsabayan sa kanya.

"I was lucky to get enough rest. If I played five sets yesterday (Friday) I don’t think I can make it," ani Saeki.

Haharapin ni Saeki para sa titulo ng $1,568 ang wild card na si Ramona Tedjakusuma ng Indonesia na nanalo ng $10, 000 sa Bandung leg sa Indonesia noong nakaraang linggo.

Tinalo naman ng Surabaya-based na si Tedjakusuma ang Thai na si Wilawan Chop-tang, 4-0, 4-5 (2), 4-0, 4-1 upang okupahan ang isang finals berth sa isang linggong event na ito na suportado ng ITF Grand Slam Development Fund, Phinma Group of Companies, PSC, Wilson ball, Manila Midtown Hotel at Viva Mineral Water.