Liboan nitambong sa rally para kang VP Duterte

CEBU, Philippines — Liboan ka mga tawo ang midagsa sa Cebu South Road Property (SRP) subay sa gipahigayon nga National Unity for Peace Rally sa mga sakop sa Iglesia ni Kristo agi og pagsuporta kang Bise Presidente Sara Duterte-Carpio.

Ang maong rally gipahigayon sa 12 ka mga dapit lukop nasud apil niini ang Davao City, Cebu City ug sa Manila didto sa Quirino Grand Stand diin gikatahong kapin usa ka milyons sakop sa INC ang nitambong.

Bisan pa man sa hulga sa panahon ubay-ubay ang mga nitambong sa maong kalihukan aron suportahan ug ipadayag ilang pagsupak sa gipasakang impeachment complaints batok sa bise presidente diha sa Ubos Balay Balauranan.

Sa inisyal nga pamahayag nga giluwatan ni Atty. Jave Mike Aton,  ang tigpamaba sa INC,  kini nibutyag nga ang ilang gihimo agi kini og suporta sa pamahayag ni Presidente Ferdinand Marcos Jr. nga nisupak sa mga planong pagpa-impeach sa bise presidente tungod kay alang sa pangulo dili kini makahatag og dakong kausaban sa kinabuhi sa tagsa-tagsa ka mga Pilipino ug adunay mas angayang maoy unahon. Sumala pa ni Aton, ang impeachment makapabahin-bahin lang kini sa katawhan.  Si Aton nitug-an ang ilang kalihukan bukas  sa tanang buot nga moapil. Nasayran nga gawas sa INC, ang kalihokan gipaluyohan sab sa PDP-Laban party ni Duterte.

Si Mayor Raymond Alvin Garcia nitug-an tanan suporta gihatag sa siyudad sa maong kalihukan ilabi na nga anaa kini sa siyudad gipahigayon.

Nasayran nga dul-an sa 300 ka mga polis ang gipakatap sa Cebu City Police Office sa palibot aron pagsiguro nga hapsay ug magmalinawon ang pagpahigayon niini.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa CCPO nagkanayon nga gipadala sab sa siyudad ang mga sakop sa Cebu City Disaster Risk Reduction and Management Office ingon man sa Cebu City Transportation Office.

Sa pagbanabana sa CDRRMO, moabot 24,000 na ka tawo ang nanambong pag-alas 3:45 sa hapon.

Sa pagkutlo ning maong balita wala’y nadawat ang CCPO nga dunay mga problema nga nasugatan nga makabalda ug makasamok sa kalihukan sa INC.  Nasayran nga gikan sa nagkalain-laing lugar sa Central Visayas ang mitambong sa kalihukan diin ang uban nag-camping nang daan sa SRP. (BANAT NEWS)