Sangka sa mga way pilde webmasters nakaipsot sa Lancers

CEBU, Philippines — Ang University of Cebu (UC) Webmasters naka-eskapo uban ang sikit nga kadaogan batok sa two-time defending champion University of the Visayas (UV) Green Lancers, 57-55, sa kulbahinam nga sangka tali sa way pildeng mga koponan sa Cebu Schools Athletic Foundation, Inc. (CESAFI) Season 24 men's basketball tournament niadtong Huybes sa gabii, Oktubre 31, didto sa Cebu Coliseum.   

Si Luther Leonard misidlak uban ang 16 puntos ug walo ka rebounds sa dihang ang Webmasters miasumir sa sa solong liderato sa college division bitbit ang impresibong 5-0 nga baraha.

Gawas sa dominante nilang bentaha sa rebounding, 57-38, luyo sa mangtas nga depensa nilang Arnold Minoza and Mc Steven Ursal nga nagkumbinar og 25 ka rebounds,  giwani sab sa Webmasters ang Lancers sa bench scoring, 35-10, nga usa ka mahinungdanong elemento pagminitinar sa perpekto nilang sinugdanan ning season.

Ang Lancers maoy mikadlit sa nag-unang singko puntos sa duwa ug bisan tuod ang Webmasters mitubag pinaagi sa 13-2 run, ang two-time defending champion miresbak sab dayon aron tablahon ang iskor sa halftime, 2727, sa wala pa miposte og 37-29 nga labaw sa tunga-tungang bahin sa ikatulong kuwarter.

Apan ang Webmasters milusad og nagbagang 15-5 rally aron ilogon og balik ang labaw, 44-42, padung ngadto sa pinal nga 10 minutos.

Ang Webmasters miabante og singko puntos, 52-47, apan sila si Jimpaul Amistoso ug Ivan Clark Alsola mipasikit sa Lancers ngadto na lang sa usa ka lugas, 55-56, sa nabilin nga 63 segundos sa duwa.

Human si John Carl Angelio mipasud og usa lamang ka free throw aron paghatag sa Webmasters og dos puntos nga bentaha sa katapusang 14.7 segundos, ang Lancers duna untay oportunidad nga makapuwersa og overtime apan napakyas gumikan kay si Alsola nasipyat sa duol kaayo niyang itsa gikan sa maanindot nga assist ni Amistoso.

Si Alsola mitapos uban ang 16 puntos ug unom ka rebounds samtang si Amistoso midugang og 14 puntos, pito ka rebounds, tulo ka assists ug duha ka steals apan nangahoyhoy ang ilang abaga gumikan kay napakgang ang lima ka duwa nga ratsada sa Lancers.

Sa laing makapaisa'g buhok ang engkwentro sa sayo pa, ang University of San Jose-Recoletos (USJ-R) Baby Jaguars nakglingawas batok sa UC Baby Webmasters, 49-48.

Sila si Kyle Mathew Barrieta ug Clark Benedick Candia combined for 23 points, nine rebounds, two assists and six steals, samtang si Jan Vince Oringo mihipos og nuybe puntos, 12 ka rebounds, duha ka asists ug tulo ka blocks aron iduso ang Baby Jaguars ngadto sa kinatas-ang bahin sa liderato sa juniors division uban ang 7-1 rekord.

Duna untay pipila ka tsansa ang Baby Webmasters nga kubiton ang daog apan wala masud ang duha ka sagunson nilang duol kaayo nga mga itsa sa hilimatyong segundos nga miresulta sa ilang pagkalagapak.

 Si Jake Lordin Yong mitali og 14 puntos, unom ka rebounds ug unom ka steals alang sa Baby Webmasters, nga natagak sa 6-2 sama sa Cebu Eastern College (CEC) Dragons.